ഹൈദരാബാദിനെ പേരുമാറ്റി ഭാഗ്യനഗര് എന്നാക്കും;ഉത്തര് പ്രദേശ് മുഖ്യമന്ത്രി യോഗി ആദിത്യനാഥ്
തെലങ്കാനയില് ബി.ജെ.പി. അധികാരത്തിലെത്തിയാല് ഹൈദരാബാദിനെ ഭാഗ്യനഗര് എന്നാക്കുമെന്ന് ഉത്തര് പ്രദേശ് മുഖ്യമന്ത്രി യോഗി ആദിത്യനാഥ്. അടുത്തയാഴ്ച നടക്കുന്ന ഗ്രേറ്റര് ഹൈദരാബാദ് മുനിസിപ്പല് കോര്പറേഷന് തിരഞ്ഞെടുപ്പിനു മുന്നോടിയായി നടത്തിയ റോഡ് ഷോയിലാണ് യോഗി ഇക്കാര്യം അറിയിച്ചത്. ഡിസംബര് ഒന്നിനാണ് ഹൈദരാബാദ് മുനിസിപ്പല് കോര്പറേഷനിലേക്കുള്ള തിരഞ്ഞെടുപ്പ്. ഹൈദരാബാദിനെ ഭാഗ്യനഗര് എന്ന് പുനര്നാമകരണം ചെയ്യാന് സാധിക്കുമോ എന്ന് ചില ആളുകള് തന്നോട് ചോദിച്ചിരുന്നു, എന്തുകൊണ്ട് സാധിക്കില്ലെന്ന് അവരോട് താന് ചോദിച്ചു.
ഉത്തര് പ്രദേശില് ബി.ജെ.പി. അധികാരത്തിലെത്തിയപ്പോള് ഫൈസാബാദിനെ അയോധ്യയെന്നും അലഹാബാദിനെ പ്രയാഗ് രാജെന്നും പുനര്നാമകരണം ചെയ്തു. പിന്നെന്തുകൊണ്ട് ഹൈദരാബാദിനെ ഭാഗ്യനഗര് എന്ന് പുനര്നാമകരണം ചെയ്തു കൂടായെന്നായിരുന്നു ആദിത്യനാഥിന്റെ പരാമര്ശം.
...