ബാർകോഴ; ചെന്നിത്തലയുടെ വാദം തെറ്റെന്ന് രഹസ്യമൊഴി പുറത്ത്

ബാർകോഴയിൽ രമേശ്‌ ചെന്നിത്തലയ്‌ക്കെതിരെ വിജിലൻസ് അന്വേഷണം നടന്നിട്ടില്ലെന്ന് ബിജു രമേശിന്റെ രഹസ്യമൊഴി പുറത്ത്. ബാർകോഴയിൽ തനിക്കെതിരെ വിജിലൻസ് അന്വേഷണം നടത്തിയതാണെന്നും തെളിവില്ലെന്നും കണ്ടെത്തിയതാണെന്നും ആയിരുന്നു ചെന്നിത്തല ഉന്നയിച്ച വാദം.

കെ ബാബുവിനെതിരായ കേസന്വേഷിച്ച വിജിലൻസ് ഉദ്യോഗസ്ഥർ രമേശ്‌ ചെന്നിത്തലയ്ക്കും, ശിവകുമാറിനുമെതിരായ മൊഴി രേഖപ്പെടുത്താൻ വിസമ്മതിച്ചു എന്നും ബിജു കൂട്ടിച്ചേർത്തു.

ബാർ ലൈസെൻസ് ഫീസ് കുറയ്ക്കാൻ വേണ്ടി കെപിസിസി പ്രസിഡന്റ് ആയിരുന്നപ്പോൾ പണം നൽകിയ കാര്യം മറച്ചുവയ്ക്കാൻ രമേശ്‌ ചെന്നിത്തലയും, ഭാര്യയും സ്വാധീനിച്ചു എന്നായിരുന്നു ബിജു രമേശിന്റെ പുതിയ വെളിപ്പെടുത്തൽ. കഴിഞ്ഞ മാസം ബിജു രമേശ്‌ കോഴ ആരോപണം ആവർത്തിച്ചപ്പോഴും അന്വേഷണത്തിന് അനുമതി നൽകരുതെന്ന് കാണിച്ച് ചെന്നിത്തല ഗവർണർക്ക് കത്തും നൽകിയിരുന്നു.

വർക്കല സ്വദേശിയായ ഒരു കോൺഗ്രസ് പ്രവർത്തകർ രമേശ്‌ ചെന്നിത്തലയ്ക്ക് വേണ്ടി സ്വാധീനിക്കാൻ ശ്രമിച്ചുവെന്നും ബിജു രമേശ്‌ വെളിപ്പെടുത്തിയിരുന്നു.

ബാർകോഴയിൽ രമേശ്‌ ചെന്നിത്തല, കെ ബാബു എന്നിവർക്കെതിരെ അന്വേഷണം അനുമതി തേടി സർക്കാർ സ്പീക്കർക്കും ഗവർണർക്കും ഇന്ന് റിപ്പോർട്ട്‌ നൽകിയേക്കും.